生活裡的辯證法「以其人之道，還自其人之身」？
正所謂「好事不出門，壞事傳千里」。
話說，旺角街頭小童尿尿視頻，連外國人也看到了，故問：
小童街頭尿尿，在香港是否犯法？為什麼你哋可以「亂咁影人」？
問題有啲難答，唯有唔提小童，只學高局長所言：「法例不容許隨處便溺，見到會執法」；但「亂咁影人」得唔得？好似冇聽講過唔可以。
雖然香港有私隱條例，名人家居生活，被記者用長鏡頭偷拍，分分鐘可以告發，
因為那是違法；但公開場合「亂咁影人」，就未曾聽講過有乜問題。
有朋友唔同意，堅持話係個人私穩嘅問題：
「你影風景無人話你，但喺街頭你冇權隨便影我，要先問過我同意戰得。
唔係，就係唔合法！」
點答？唯有用：「各處鄉村各處例，喺美國或犯法例，但喺香港則有自己嘅慣例。」
嚟應對。點知佢繼續又講：
「你哋有啲人咪成日將「人權」掛喺嘴邊嘅，點解依家又唔講喇？」
今天，香港街頭時興他拍係事實。相對於潮流興自拍來講，他拍當然是特意影他人了。
自拍係個人喜好，唔關你乜嘢事。但他拍卻因為涉及了他人的私隱，而且多在公眾場合你我三唔識七，一句「你做乜影我」，惹上官非就唔好喇。
這種港式他拍，有它特別的社會心理原因，那就是「睇唔過眼」。路見不順眼的事，先用手機拍下，再放上網公開，大家齊齊討論。例如，從「巴士阿叔」、「十四巴港女」、
「洗衣街小巴開上行人路」，到今天「小童旺角街頭尿尿」，都是港式他拍嘅最好例子。
話又說回來，恕我杞人憂天。凡事都有兩面，如果人人都可以拍，
那麼，會否有朝一日，自己坐錯關愛座，或飛身亂過馬路時，
甚至坐巴士瞌眼瞓留口水的窘樣，都會有人睇唔過眼，先影低然後放上網？
希望唔會？
真希望熱心港人做事都有分寸，唔好「以其人之道，還自其人之身」，「你做初一我做十五」、「以牙還牙，以眼還眼」，
將香港變成「無品」之都就好了。
