1.2.-小說：霧裡看「花」 作者：布衣碩子
第一三六回 「變幻原是永恆」之——兒戲
“ 嗰日，最後一個佔領區——銅鑼灣怡和街順利清場，
大家正想趁過聖誕開心一下之際，
學聯又展開咗新一輪嘅「不合作運動」。想鼓動全港約230萬名公屋居民，
及174萬名納稅者「抗租拆稅」。”
精叻鼠對記者貓講。
“ 點樣個「抗租拆稅」法吖？”
“ 所謂抗租——就係叫公屋居民，
唔好按照以往月初就交租嘅做法，改為月底戰交。
一方面減少房委會嘅利息收入之餘，又增加追數嘅工作量；
而拆稅——就係將應繳稅分拆成68.9元、689元或者6,890元，
並逐一寄出支票，以此嚟增加稅務局嘅工作量。
（689係特首的代碼，係一句，用上海話發音嘅粗口「儂巴鳩」。
——筆者注）
正如喺「三子」發動「佔中」之前，好多人估計嘅一樣，
正式係「嘀咑佬甩利士——白谷」（做咗都冇錢收）。
因為搞「佔中」唔會迫到中央讓步，而只會搞到香港市民自己。
唔係咩，你霸佔咗馬路，包圍咗政府總部，
結果中央同港府都冇讓步。
你拆散支票、遲交稅，就會逼到佢哋讓步？唔好咁天真啦。
依一招，唔係冇人未試過㗎，
結果咪又係變成咗為搞而搞嘅運動，後來仲成咗「泛眾憎」添。”
“ 計我話吖，仲係嗰一句——「毋忘初衷」。
快啲疊埋心水拎起書包一面心讀書把啦，
唔好再搞「泛眾憎」嘅嘢喇。”
記者貓加上一句。
“ 就好似叫人包圍政總咁，到最後咪搞到示威者同警察衝突。
依個時候「佔中」律師團就出嚟講嘢嘞：
「係你哋用暴力㗎咋，唔關我嘅事吖，
因為我冇叫到你哋咁做㗎。」”
“ 睇清楚啲啦，佢哋只負責發動群眾，若群眾有過火行為，
一於卸膊話唔關我嘅事。
依啲咪就叫做「先乃無稽之談，後乃見機而作」囖！
你哋啲學生邊度夠啲政棍狡猾吖……”
“ 仲有添吖，如果你間公屋無人住／報大咗人數／
做咗商業用途／租咗畀人用；
又或者有部份收入無報稅，其身不正，
就千其唔好參與依類「泛眾憎」嘅運動。
如果唔係，你一搞政府就嚟查你，
隨時會查埋其他啲衰嘢出嚟添㗎。
咁就真係，「好做唔做，年三十晚謝灶」嘞。”
“ 話時話吖，成個運動嘅構想都有啲天真、可笑，
其實搞唔到政府，反而搞到其他人。
諗埋啲屎橋，依啲咁樣唔顧現實嘅激進行為，
就講明咗佢哋已經「兒戲」到，甚至要以「無政府主義」手段，
嚟對整個社會進行報復吖……”
你一句我一句，兩條友說個不停……
「抗租拆稅」http://www.hkcd.com.hk/content/2014-12/20/content_3410777.htm
