1.1.-小說： 霧裡看「花」 作者：布衣碩子
第一三五回 「變幻原是永恆」之——「打不死」的香港精神
“ 今年旅遊發展局又獲得商界贊助，除夕夜將喺尖沙咀文化中心外，
舉辦倒數晚會迎接新年，屆時維港上空將要燃放七彩繽紛嘅煙花。
大家辛苦咗一年，全情投入形形色色嘅除夕倒數活動之中，
快快樂樂開開心心，盡情玩個痛快，亦未嘗唔係一件美事噃。”
“ 係吖，俗語都有話啦：天有不測之風雲，人有剎時滿身銀。
經歷咗一場「雨傘」風暴，大家嘅生活剛剛入番正軌，社會秩序啱啱回復正常，
係好應該慶祝一下先得嘅……”
“ 咁樣就再一次證明，香港無論面對幾許風雨，經歷多少風浪，
香港人始終都可以坦然面對，足見依種「打不死的香港精神」嘅威水。”
精叻鼠接著記者貓嘅話題又講嘍噃：
“ 隨着風暴遠去，市民都期待明天會更好，
即係話以「打不死」嘅精神創造未來。
譬如，多與家人聚敍，多同好友交談，多外出shopping，多開心消費。
咁樣，不但可以禮送他人，仲可以獎賞自己。
自己開心時，別人也感激。
大家開心之餘，亦可以振興經濟，增加職位，真係何樂而不為。”
“ 係吖，旅發局每年都得到大企業嘅贊助，
喺維港發放煙花，當中亦加插唔少精釆節目。
所以，每年都得到歐美主流媒體嘅重視，
將實況錄影向自己國家甚至世界各地直播。
咁樣，提高香港國際形象之餘，亦吸引海外旅客逗留、消費。
的確係一件美事，因此亦成咗香港一年一度嘅國際盛事嘞。”
“ 恐怕今年嘅倒數迎新年晚會，會加多啲插曲都話唔定囖？
好可能有啲人會趁機，「流動佔領」又或者「鳩嗚」示威添噃。”
精叻鼠補充一句。
“ 咁樣就唔得人心喇……計我話呀：
不管您是誰，只要來存錢、來花錢的我們就無限歡迎，來者不拒 ;
管他甚麼貓，捉到老鼠就是好貓 ;
管他甚麼娘，有奶便是娘 ;
亦不管它是甚麼「風」，只要是順風，便可乘風破浪，
因為香港是一個法治之都；是一個天然的、優良的「自由之港」。
總之「有容乃大」才是香港的生存之道吖……”
